因為阿Cow陳志康生日, 我早幾晚約佢同幾個球員成功晉身教練/領隊既球員一齊食餐飯。
係好難得, 難得在於, 呢幾位都係我喺南華時代好悉心…唔好話栽培, 但最少係我好悉心咁同佢地鋪路, 好想睇到佢地成功轉型，一直喺球圈發展既球員.
睇住佢地大, 過去曾經有我成日喺更衣室鬧佢地既日子; 我又迫佢地成長, 佢地每一個, 都係我半迫半哄佢地掛靴, 早過佢地做好心理預備既時候, 就極力游說佢地起步, 為未來鋪路轉型.
但係, 做人就係咁, 要早啲做好準備, 好多野唔可以到時再算, 我出名緊張大師, 先天下之憂而憂, 康仔坦言, 當年佢好嬲我迫佢做助教, 但今日佢非常明白.
當年, 我迫過康仔光仔去學英文考教練牌; 而家既文彼得被我迫得仲緊要, 威廉亦都係我心目中好有潛質既管理人員.
睇住康仔、光仔今時今日獨當一面, 係香港超聯球隊總教練, 雖然唔再係幫我手, 但我都好開心, 講真, 好proud.
我原來92年就識康仔, 23年, 今年第一次同佢食生日飯慶祝, 第一次同佢「隊酒」, 我地跟住仲去唱歌, 被班衰仔拍晒片, 而我就斷晒片…
呢一晚真係好開心, 大家記住, 一定要繼續進步, 呢個係我地對香港足球既共同心願! Shanghai Lo 上海佬餐館
Search